النويبية مختفية ومو عارفين السبب؟

المخضرم عبد الله وصيد البالول في الفنطاس
ما أجمل نسيم الصباح هذه الأيام، وصيد العصاري قبل غروب الشمس، والشعم طافح ويضرب على الشريب من غير تردد، وصيده مضمون بالحيشان والرشدان والبالول على أسياف الفنطاس متولينه حداق وتشخيط والسبيطي بين ويبيله نواخذة خبرة بالمحادق وماياته، اما النويبي فمختف عن الأنظار ومعظم الحداقة
مو عارفين السبب؟
واكد معظم الحداقة ان شهر نوفمبر هو بداية موسم الصيد الحقيقي، حيث تكثر وتتنوع الأسماك فيه وتلعب الخبرة والحرفنة دورها في معرفة الأوقات والمايات، وتبقى جزيرة عوهة أم الخير وفيها حاليا شعم وبالول وييمتها مصير وربيانة، أما عشاق التشخيط فأفضل المواقع هي سواحل الفنطاس والزور وغيرها من المعلومات والأسرار من خلال هذا الاستطلاع.

في البداية يقول محمد المازن:
الشعم في ماية الفساد يرمرم وكأنه نويتف، وحركته بسيطة،
وهنا لازم تلشطه، أما على ماية الحمل فالشعم يصيد نفسه اذا حدقت له بالشريب،
وخصوصا بالنهار وصوب الحيشان والرشدان.
وقال: بالشريب صيدك مضمون للي يعرف له، والحداقة يقولون هالايام الشريب الواحد قيمته دينار،
بمعنى أنه يضرب عليه الشعم، ويقولون ايضا ينتهي موسم الشريب مع نهاية الشهر الجاري
وبعدها يأخذ على الربيانة.
وعن اختلاف الشعم الاصفر والشعم الازرق قال: الشعم الاصفر هالايام في عوهة ويبيه مصير او ربيانة أما الشعم الازرق ما يضرب الا على ربيانة وشريب وموجود حاليا، وفي كل وقت واحيانا يأتي بأحجام عودة، وهناك حداقة يفضلون الشعم الاصفر على الشعم الازرق، لأن لحمه طري، وبعض الحداقة يقولون الشعم الازرق دولار ويأتي بأحجام عودة.. وعسى الله يرزقكم من خيره ويعافيكم في كل طلعة بحر وصيد.

الجم طافح بالدفان
ومن جانب آخر، التقينا أحمد الجعفر وقال: حدقنا بالحيشان وييمتنا ربيانة ولم يحالفنا الحظ إلا بصيد قليل من الشعم، أما النويبية فهي مختفية، ومو عارفين السبب ما لها أثر، ويفترض أنها تارسة البحر قبل شهر، لكن يبدو أن الأجواء تغيرت، وما صدنا منها إلا 3 حبات صوب الرافعات وخيوطنا 40 و50 ركه، وكانت مايتنا فساد وعلى آخر السجى.
وقال: الشعم موجود بالرشدان ويبيله شريب، وكذلك السبيطي موجود ويضرب أكثر على ماية الفجر
أو المغرب.
وأضاف الجعفر: متعنين للنويبي، لكن ما صدناها ويقولون موجودة بالركسة، وصيدها أيضا قليل، لأن اللي
ما يصيده 50 وما فوق من النويبي معناه مو صايد، والغريب أننا كنا نقول الهويات، ومر علينا كوس وضرب شمال وأيضا ما بينت، وقبلها كنا نقول بسبب الصيادين، وهالأيام ممنوعين من الصيد، وأيضا ما بينت، وإلى الآن مو عارفين السبب؟

وقت الربيانة
ويقول ضاري الروضان:

الجو برد والشعم الشتوي يبيله ربيانة، وأيضاً الشريب أيودع ويصير طري ما ينفع لذلك نقول إن هالأيام وقت الربيانة، وأفضل محدق هو الحيشان. أما الدفان فلا تقرب طافح فيه الجمْ، وممكن تترس طرادك جموه وحتى لو حدقت بالشريب يضرب عليه، ونصيحتنا للحداقة هي لا تقرب صوب الدفان متروسة جم، ويضرب على كل شيء حتى الشريب!
وأضاف: من المتعارف عليه إذا طلع الجم تدخل النويبية العودة، لكن الشيء العجيب دخل علينا شهر 11 والجم ما انقطع، أما محادق عوهه أم الخير فيها شعم ونويبي وموزايد وييمتها أيضا ربيانة. أما الهامور والبالول فهذا وقتهما، وهذه السنة طافح وقبل أيام صدنا 11 بالولا صوب الفنطاس وبالشخيط، وأيضا يوجد بالزور، والأيام المقبلة يدخل الحيشان والجون بشكل عام.
البالول بالفنطاس
ويقول غازي الصلال:
النويبي هالايام صيده تلاقيط بالشيف وبالحيشان على ماية الفساد وتكون باحجام عودة، وايضا بينت قبل ايام في الركسة وصادوا منها كميات كبيرة وبعد ايام انقطعت.. والبعض يقول انها سمكة عابرة، وقال: وين ايام قبل اذا احضرت النويبيه ما تلحق حلالي وتعجز من تل الخيط، واتذكر في احدى رحلاتنا انترست الثلاجة والمقم وتعبنا من صيدها وكنا صوب البويه البرقه والقفص.
وقال: البالول في شهر اكتوبر مكانه الفنطاس ويوالم معاه شعري عود وخاصة بالقطعة الشمالية ويبيله ماية آخر السجى، بشرط تعادل القطعة وتنزل الملمص بالطينة وخيوطك نازلة اول طلعة القطعة وييمتك بربوق مع العلم ان البالول يضرب على كل شيء سواء يوافه او راس خثاق او ميده.. ولكن سبحان الله يرغب البربوق.
ويقول بوفيصل:
في احدى رحلاتنا كان معي بالطراد الاخ والصديق فهد ابراهيم وتوجهنا الى محادق جزيرة كبر وطحنا على لحف «شق عود» وفيه هوامير تشوفها بالعين ونزلنا خيوطنا وجربنا كل ييمه من باسيه ومجوه وبزيمي ما يحركها ولا يقرب صوبها.. وكان عندنا خثاق فقلت خلنا نجرب رأس الخثاق وشكيته بالزانة ولما صك الخيط نام فيه ولحق ما تلحق على راس الخثاق. وقال: ايضا النويبي نهم ويضرب على كل شيء كما هو متعارف عليه، ولكن احيانا يرغب الخثاق وتذبحها على العومة وساعات لها ييمه ما تخطر على بالك وبعض الحداقة المتخصصين بصيد النويبي يحدقون لها بخيط 70 واذا احضرت تضرب حتى على الدريه.
واضاف: تباشير طيبة هالايام للنقرور وبين بكثرة وتارس السوق وباحجام متنوعة وان شاء الله الموسم خير وصيده مع دخول الشتاء اكثر واكثر، وخاصة اذا كان الهواء شمال بارد.
وقت الشعم
ومن جهته، يقول علي اليوسف: البحر هالايام يبرد جبدك ويونسك بالجو الحلو والصيد الاحلى والاسماك. البيضة الطيبة ويا زين الطلعة اذا اشتغل عليك السبيطي، ولا تنس نوع الييم من ميد ومصير وربيانة وشوف شنو ترغب.
وقال: هالايام وقت صيد الشعم حتى دخول الشتاء وافضل الخيوط هي 30 و35، وللسبيطي جرب 40 على ماية السجي، لان ماية الثبر ميتة ما فيها جرة، وايضا جرب الييم يكون مصير ولا ربيانة اول الفجر، وانصح بحداق الدوحة او الصبح فيها شعم وسبيطي ومزيزي، ولا تطول ارجع مع آذان الظهر ويبيلك شريب وممكن ياخذ على الربيانة، لانه قبل ايام صيدنا كله على الشريب يطير فيه وبعد ما خلص علينا مو راضي ياخذ على الربيانة نهائيا. ومن افضل المايات آخر الثبر والزورية محاياه للبالول وحدة بوحدة.

الشعم بالرشدان
يقول شملان الرشيدي:
محادق الرشدان فيها خير وخاصة مع رشة المايه ما ترجع من غير الشعم
وبأحجام طيبة، ويفضل من الساعة 10 صباحاً وعموماً الحداق في الدوحة كله حلو وفيه رزق.
وأيضاً الحداق المحترف وأصحاب الخبرة يقولون إن الحداق ودخول البحر للصيد لازم يكون بحسبه مو داش وما يدري متى رشة المايه ومتى وقفتها.. وطبعاً كلامي ما فيه تجريح لأن كلنا نتعلم ومو غلط أو عيب أن نسأل أو نتعلم. وأضاف: يا زين طلعة البحر ومعاك ربعك شقردية وعلى قلب واحد تصير كلها ملح وتتكحل اذا كانت فيها صيد ومنافسة على السبيطية ولا مزيزيه وشعيمات. ومن أفضل المحادق الحيشان والدوحة والرشدان، ولا تقرب صوب الدفان.. وأيضاً ما زال الشعم يرغب الشريب حتى نهاية شهر نوفمبر.

رعاية الحداقة الصغار!
شيء طيب جدا، ويسعدني رؤية الشباب الصغار يمارسون هذه الهواية الطيبة بكل سعادة، منبر التوعية، منتدى يا كويت نت
متخصص في نشر ثقافة التعامل مع البحر والنهوض بالتوعية البيئية والمحافظة عليها. وله دور طيب في توثيق هذه الهواية الشعبية الجميلة المتأصلة في المجتمع الكويتي مما يعد تشجيعا للنشء على ممارستها بشكل طيب ومنظم.
ممارسة هذه الهواية تهدف إلى شغل وقت الفراغ بما هو مفيد (صايد وفايد)، ويحمي الابناء ويبعدهم عن الهوايات الضارة والخطرة في بعض الاحيان، كما ان هذه الهواية تعلّم الأبناء الصبر وتعوّدهم على الخشونة والرجولة، لذلك تعتبر هواية الحداق عاملا ايجابيا للصحة النفسية عند الشباب، مما يساعد الشباب على اداء واجباتهم الحياتية بايجابية، ويظهر ذلك بوضوح في جانب التحصيل الدراسي والعلمي،
حيث يكون الشباب قد أخذوا كفايتهم من الجانب الترفيهي.

النوخذة نوري الشماع