في الديكور العصري استبدلي الدهانات بالزجاج
الزجاج بقى متطور في أشكاله واستايلاته وبيدخل في كل جزء من أجزاء الشقة
أي حد بيفكر يجدد في ديكور شقته لازم يتعرف على أحدث استايلات الديكور..
ويتابع الجديد باستمرار علشان يعرف إيه أحدث الديكورات المنتشرة دلوقتي..
وأي حد متابع لموضوع الديكور هيعرف إن الزجاج بقى متطور في أشكاله واستايلاته..
وبقى كمان يدخل في كل جزء من أجزاء الشقة؛ بداية من التحف حتى أثاث الشقة نفسه..
علشان كده قررنا في الموضوع ده نعرف كل حاجة عن الزجاج، يعني أنواعه وأشكاله واستايلاته..
وكل ده هنعرفه من المهندسة رشا محمد زينهم؛ أستاذ تصميم الزجاج بكلية الفنون التطبيقية.
البارافان بيكون نصف شفاف وبيسمح برؤية اللي وراه
في البداية عايزين نعرف إمتى بدأ الزجاج ينتشر كصناعة وديكور في مصر؟
في الأول؛ عايزة أتكلم عن حكاية تاريخية طريفة عن بداية انتشار الزجاج في مصر، وهو أن مجموعة من الناس كانوا قاعدين على أحد الشواطئ الرملية، والرمل هو في الأساس أكسيد صوديوم، ففكروا يولّعوا النار وسابوها فترة، وبعدها وجدوا إن الرمل تفاعل مع النار وبدأ يسيح، وعمل طبقة من الزجاج؛ فالزجاج في الأساس هو رمل، وبمساعدة الصوديوم بيتحول إلى زجاج.. وبعد كده بدأوا في التنقية وتزويد الأكاسيد علشان درجات اللون.. لحد ما الفراعنة اكتشفوه وصنعوا منه التحف والحلي اللي موجودة دلوقتى في المتحف المصري.
لكن إزاي الزجاج تطور من زجاج عادي ساده إلى زجاج ملون وبالتصميمات دي كلها؟
مع التطور تم اكتشاف مادة اسمها "ميفيوري"، وهي عبارة عن خطوط ملونة زي الأعمدة الزجاجية، بتتعالج وبتوضع في درجة حرارة معينة وبيتعمل منها أشكال الرخام والزجاج المزخرف.
وبعد كده بدأ الزجاج يدخل في كل جزء من حياتنا؛ بداية من الطبق والكوباية لحد واجهات العمارات؛ لأن الطوب الزجاجي للواجهة المعمارية بيعكس الرياح والأتربة والحرارة، وكمان بيعمل منظر جمالي رائع، وده هنلاقيه منتشر أكثر في دولة دبي والدول الأوربية، والآن منتشر في مصر.. ده غير إن ديكور الزجاج بيدخل في تصميم السقف والتابلوهات والتحف الفنية والأرضيات والسيراميك.
ممكن أدخّل السيراميك الزجاجي بدل البانيو لأنه مش موضة دلوقتي
وإيه الفرق بين سيراميك الأرضيات العادي وسيراميك الزجاج؟
في حاجة اسمها أسفلت زجاجي، بيكون عامل زي السيراميك بالضبط، وبيتعمل بمواد أوكسيدية، وبيتقطع ويتجمع بنفس المواد وبيتعمل زي السيراميك والرخام وبنفس الأشكال، وبيختلف عنه في إن السيراميك الزجاجي أشكاله وألوانه مش موجودة في السيراميك العادي، ده غير إنه مقاوم للصدمات والكسر والزحلقة، ولا يحتاج إلى سجاد.
أتعرّف إزاى على خامات الزجاج الحديثة اللي بتناسب ديكور المنازل؟
خامات الزجاج كثيرة جداً منها: الزجاج الشفاف، وبنستخدمه أكثر في الشبابيك والأبواب، وبدأ يتطور وبيتعمل منه شغل حفر وليزر، وبيُزوَّد بملونات حرارية بتدخل أفران في درجة حرارة معينة؛ علشان نحافظ على اللون إلى الأبد، وكمان تنظيفه يكون سهل.
أما الزجاج المعشق فهو مجموعة من الزجاج الملون، بنجمعها مع بعض بخامة الرصاص وفيه كمان الزجاج الملون العادي زي اللون الأصفر والأحمر..
وفي كمان الزجاج العاكس، وبيكون عليه طبقة Coating أو طلاء، وهو عبارة عن شريط فيلم رفيع بيتعمل عليه في الأول التصميم اللي أنا عايزاه وأعالجه بمعالجات حرارية، وبعد كده أضعه على شريحة الزجاج، وفي نفس الوقت يعكس الشمس والرؤية، وبيكون شكله زي اللوحه الفنية.
ونيجي بقى للزجاج النحتي وهو زجاج بيكون السمك بتاعه بين 5 سم إلى 7 سم، ونحته بيكون بارز وأقدر أضعه داخل اللوحة أو قطعة ديكور، أو دوش حمام أو حوض حمام، أو واجهة معمارية، أو كأثاث غرفة سفرة.
وإيه الزجاج الحديث اللي بيكون بديل عن الزجاج الفيميه المعروف؟
فيه دلوقتي الزجاج العاكس، وهو بديل عن الزجاج الفيميه، وبيعكس الحرارة بدرجة كبيرة وبيحجب الرؤية، يعني اللي جوه الشقة يشوف واللي بره مايقدرش يشوف اللي جوه الشقة، ده غير إن ألوانه كثيرة جداً غير الأسود والبني المعروفين عند الناس على عكس الزجاج الفيميه اللي بيساعد على الرؤية من الداخل والخارج.
وهل ممكن أستخدم الزجاج بدلاً من الشيش؟
الزجاج دلوقتي بيقوم بنفس فائدة الشيش المعروفة، وبيكون عاكس للضوء والحرارة، وممكن كمان نستبدل الشيش بالزجاج الأوبال، وهو زجاج معتم وألوانه كثيرة ومعبرة، وبيمتص درجة الحرارة والرطوبة، ويحجب الرؤية من الخارج.
والزجاج الألوميتال موضة لحد دلوقتي؟
الألوميتال دلوقتي مش موضة، والبديل عنه هو "سبيدرسيستم" وهو عبارة عن حديد زي "الأكس" ومعمول بمسامير غير واضحة في أطراف الزجاج، بتربط أجزاء الزجاج ببعض، وفي نفس الوقت مش ظاهرة.
ولكن إيه الفرق بين الفاصل الزجاجي بين قطع الأثاث وبين البارافان مثلاً؟
البارافان بيكون نصف شفاف، وبيسمح برؤية اللي وراه، أما الفاصل الزجاجي اللي بيكون على شكل طوب زجاجي، وبيفصل بين السفرة والأنتريه مثلاً؛ فهو عبارة عن طوبة فيها تصميم معين، وبتترصّ وحداتها جنب بعضها زي شكل الطوب المعروف، والسُمك بتاعه بيكون كبير وبيفصل الرؤية، وبيكون زي الحائط بالضبط.
بالنسبة للباب الرئيسي ممكن أعمله كله بالزجاج وأحمي الزجاج من ورائه بالحديد
يا ترى الأشكال الحديثة من زجاج شباك المطابخ والحمامات بيكون عامل إزاى؟
شباك الحمام والمطبخ بالذات تَطوّر جدًّا دلوقتي، وبيتعمل من الزجاج الشبَكي واسمه "ويرد جلاس"، وهو مانع لدخول الحشرات والحيوانات القارضة، وبيكون سُمكه كبير وهو عبارة عن سلك ما بين طبقتين زجاج، وأسعاره رخيصة.
وإيه التصميمات الزجاجية الحديثة داخل الحمامات والمطابخ؟
بالنسبة للحمامات ممكن أدخّل السيراميك الزجاجي بدل البانيو لأنه مش موضة دلوقتي، وممكن استبداله بعمل دوش عادى وتحته حوض في الأرض وأقفل منطقة الدوش بالقواطع الزجاجية، وبيكون عليها أشكال جميلة من النحت الزجاجي أو الزجاج الحفري، أو زجاج "الفيوزبيج".. وده بيكون مناسب للمساحات الصغيرة، وألوانه بتكون مناسبة للسيراميك العادي الموجود في الحمام.. أما حوض التشطيف فبيكون حوض زجاجي وله أشكال وألوان عديدة، وممكن تكون على شكل ودَعَة مثلاً.. أما الحوض الخزفي العادي فبيكون محدود في الأشكال والألوان.
والمطابخ إزاى يدخل فيها الزجاج الحديث؟
كل الناس دلوقتي عايزة تعمل مطبخ أمريكاني، فممكن أعمل الكاونتر اللي تحت كله بالزجاج وبأي نوع من الزجاج؛ سواء كان نحتي أو موزاييك أو فيوزنج أو بلاطات زجاجية.
بنشوف الحين سفرة كاملة من الزجاج.. شنو الفرق بينها وبين الخشب؟
السفرة الزجاج الحين موضة جداً وبتعطي شكل جمالي، وبتكون مصنّعة من زجاج مضاد للصدمات ومعالج بإعادة التشكيل، ويعالج في درجة حرارة تصل إلى 1000 درجة مئوية، ويقبل وضع الأشياء الساخنة.. وسُمك الزجاج بيكون حوالي 2 أو 3 سم، بالإضافة كمان إلى النيش الزجاجي اللي بدأ يترسم عليه زجاج ليزر وبيتعمل عليه رسومات بسيطة وهادية، وبتعطي شكل جميل، بالإضافة إلى إن الزجاج ده مهما حصل لا يقشر ولا يتكسر بالمقارنة بالخشب اللي بمرور الوقت بيقشر.
شلون أجمل الأبواب داخل الشقة بالزجاج؟
بالنسبة للباب الرئيسي ممكن أعمله كله بالزجاج وأحمي الزجاج من ورائه بالحديد، أو الباب يكون كله حديد وفيه قطع زجاج.. أما بالنسبة لأبواب الغرف فممكن أدمج الخشب مع الزجاج، يعني أعمل الباب كله خشب وجزء بيضاوي أو مستطيل منه أطعّمه بالزجاج المعشق أو الزجاج الملون بإعادة التشكيل "ميوزينيج جلاس".
ممكن أعمل باب البلكونة الألوميتال مثلاً كله بالزجاج؟
الموضة الحين إني أعمل شاسيه حديد بدلاً من الألوميتال، وبيكون باب جرار أو ثابت، والزجاج نماله بيكون عاكس وبيمنع دخول الأتربة، وبيكون نوعه زجاج حفر بالرمال.
طيب وبالنسبة للشبابيك الصغيرة؟
الشبابيك الصغيرة الموجودة في الشقة بتكون زجاج معشق بين طبقتين زجاج، واسمه "لمتينج جلاس" و بيحمي الشقة من الأتربة، ولا يتعرض للرطوبة وبيعكس الضوء حسب الألوان الموجودة فيه.
وشنو الفرق بين السقف الساقط الزجاجي وبين السقف الساقط العادي؟
السقف الساقط الزجاجي يعمل انعكاس للألوان، وبيكون بداخله إضاءة صفراء غير ظاهرة، بتعكس جو هادئ وإضاءة مريحة لمّا انعكاس الألوان يينزل على الأرض، وينور جو الغرفة أو المكان بشكل عام.
شلون أنسق ألوان الزجاج مع الأثاث ودهانات الشقة؟
ممكن نحس في الأول إن الألوان كثيرة، لكن مع الإضاءة بتعطي جو هادئ، وممكن أنسق الزجاج مع الطراز، يعني مثلاً المودرن يتناسب معاه الزجاج اللي بلون واحد، أو لونين مثل الأحمر والأسود.
لكن الطراز الكلاسيكي يبي ألوان هادية جدًّا مثل العسلي والسيمون والأزرق، وفي الآخر يكون على حسب ذوق صاحب الشقة؛ ولكني انصح باختيار الديكورات في نفس وقت اختيار الأثاث.
وبس..
إلى اللقاء،،،
