العملية الاثنانية درس جديد كليا على عيالنا بالحادي عشر علمي .. وعشان تفهمونه لازم تفهمون إن كل شيء راح يكون أول مرة ينسمع .. يعني تكفون لا تربطونه بأي شي تعرفونه بالرياضيات !
[hide]
أهم شيء نعرفه .. قبل لا ندش بالعملية الاثنانية .. ليش تسمت عملية اثنانية .. ؟
والجواب .. لأنها عملية تكون بين عنصرين اثنين ..
والحلو إن الجواب لازم يكون عنصر واحد !
يعني لما آخذ ال 5 .. مع ال 3 .. وأسوي لهم عملية + مثلا .. يصيرون 8
يعني عنصرين طلعوا عنصر واحد باستخدام عملية الجمع المعروفة .. !
العملية الاثنانية .. هي عملية حالها حال الجمع والطرح والضرب والقسمة .. بس المشكلة إن وظيفتها مو معروفة .. !
يعني مو هي اللي تجمع .. ولا هي اللي تطرح ..
طيب أستاذ ؟ شنو وظيفتها ؟!
وظيفتها يا شطار .. موجوده في بداية كل مسألة !!
طيب استاذ .. الجمع علامتها + .. والطرح - .. هالعملية الاثنانية (الخايسة) شنو علامتها ؟!
والله يا حلوين علامتها ... أي علامة يختارها المدرس .. وبالعاده نختار * ومرات نستخدم o
طيب .. استاذ استاذ استاذ .. ما ودي ألوع جبدك بهالسؤال .. بس هالحجي كله مقدمات . . وين المهم؟!
شنو يجي بالامتحان!؟
اللي يجي بالامتحان .. واحد من هالسؤالين !
يووووه .. لا تعلمون أحد .. لا تقولون أ.محمد قال .. !
اسمعوا السالفة .. واسكتوا !
السؤال الأول:
إذا كانت
أ * ب = أ + ب -5 لكل من أ،ب ينتمون الى ص+
بين أن * ابدالية
بين أن * تجميعية
أوجد العنصر المحايد
عين العنصر النظير
واذا يبي يغثك زيادة .. يقولك أوجد نظير العنصر 3!!
5 أسئلة .. اليوم نبي نحلهم .. وبالأخير أعطيكم السؤال الثاني ... ونشوف وين نوصل معاكم !
بالبداية .. لازم نعرف إن أي طلب يطلبه بالمسألة ((لازم يكون في قانون نكتبه قبل لا نحل)) ..!
والقوانين لازم نحفظهم .. ..لازم نحفظهم .. لازم نحفظهم !
يالله نحل !
بسم الله الرحمن الرحيم .. !
لكي نثبت إنها ابدالية نكتب القانون التالي ..
أ* ب=ب*أ
ولعلمكم الخاص تقريبا كل المسائل لما نسولف على الابدالية تقريبا راح نكتب نفس الحجي .. !
طيب شنكتب
أ*ب= أ+ب-5 ((حسب القانون اللي بالمسألة))
= ب+أ-5 ((نبدأ بالرموز بس))
= ب*أ ((احنا نكتبها ))
بما ان أ*ب=ب*أ ..
اذا * عملية ابدالية !!
------
التجميعية .. .!
شنو قانونها ؟!
(أ*ب) *جـ = أ*(ب*جـ) ((لازم نكتبها قبل حل السؤال))
في طريقة رياضية .. رسمية .. وفي طريقة (نص كم)
والطريقة النص كم صحيحة وجنها البخت ولو سويناها ما ننقص عليها ..!
يالله نركز شوية لأن مشكلة الاثنانية بهالتجميعية .. الله يآخذها !
الطرف الايمن بالقانون عبارة عن
(أ*ب)*جـ وهالحجي شنو يساوي .. ! (لاحظ جم نجمه موجودة)
(أ+ب-5) * جـ
بما ان الموجود نجمتين .. .. فراح نكتب ال أ .. وال ب .. وال جـ يم بعض .. وبينهم الزايد .. بشكل عادي ..
ونشوف الرقم اللي معاهم .. (بالمسألة اللي فوق موجود -5) .. هالرقم بالذات نكتبه مرتين (لأن عندنا نجمتين )
يعني الطرف الأيمن يصير ..
(أ+ب-5) * جـ= أ+ب+جـ -5-5 = أ+ب+جـ-10
الطرف الأيسر لازم يساوي الأيمن .. (لأنها اثنانية أصلا)
فلازم نكتب القانون بالاول .. (مال الطرف الايسر)
أ*(ب*جـ) = أ*(ب+جـ-5)
وبعدين نقص على المدرس .. ونكتب نفس اللي طلعناها بالطرف الأيمن ..
ونقول بالأخير ..
بما ان الطرف الايمن = الطرف الايسر
اذن * عملية تجميعيه !
--------------
شلون نلقى العنصر الموحد .. !؟
شنو القانون ماله ..
أ*و=أ
مهم نسأل نفسنا .. شنو وظيفة ال* ؟!
ال* بهالمسألة .. تآخذ العنصر الأول وتجمعه مع الثاني وبعدين تنقص 5 !
يعني أ*و=أ (تصير)
أ+و-5 = أ (نحاول نطلع ال و بروحها .. لأنها العنصر المحايد اللي ندوره)!
نودي الألف اللي باليمين .. وال5 للجهة الثانية باليسار ونغير اشاراتهم .. فتصير !
و= أ-أ+5
ومنها و=5
---------
عشان نطلع العنصر النظير لازم نعرف شغلة مهمه بعد .. العنصر النظير مو رقم .. ((قانون ينكتب))!
شلون !؟
قبل ال شلون .. لازم نعرف شنو القانون مال النظير
أ * أ(شرطة) = و
طبعا ال أ ... هذي الألف مالتنا اللي كل شوي نكتبها
وال أ(شرطه) هي النظير اللي ندور عليه
وال و (العنصر المحايد اللي قبل شوي طلعناه)
نكتب القانون مرة ثانية
أ * أ(شرطة) = و ((شنو وظيفة ال*؟؟.. الأول+ الثاني -5)
أ+أ(شرطة)-5 = 5 ((الخامسة الاخيره هي العنصر المحايد اللي طلعناه قبل شوية))
نحاول نخلي أ (شرطة) بروحها .. فراح نودي كل شي باليمين للجهة اليسار مع تغيير الاشارة !
أ(شرطة)= 5+5-أ
أ(شرطة) = 10-أ ((لاحظوا إن أ(شرطة) اللي هي النظير.. عبارة عن قانون .. مو رقم ))!
-----------------
نجي للسؤال المغثة اللي مزودينه بالسؤال .. أوجد نظير العنصر3 !!
شنو نسوي ..
نآخذ القانون اللي طلعناه بالنظير .. ونشيل ال أ .. ونحط العنصر اللي يبي نظيره ..
يعني 3 َ = 10 - 3 = 7
وبس !
تعبت من الكتابة .. صارلي ساعة ونص أكتب ..
ان شاء الله نسولف عن الزمرة وقت ثاني .. بالمناسبة السؤال الثاني اللي يجي بالامتحان ..
أ*ب= 3 أ ب .. ويبي نفس الطلبات السابقة .. حاولوا نحلونها .. ((بس ترا الارقام تتغير ))
[/hide]
موفقين خير
