كل ما يهمك عن سنة ثانية ... لطلبة البشري او الأسنان.. تجده هنا
كل ما يهمك عن سنة ثانية ... لطلبة البشري او الأسنان.. تجده هنا ( م / ن )
بسم الله الرحمن الرحيم
السلام عليكم ورحمة الله وبركاته
مثل ما عودتكم ... بعد انتهائي لسنة أولى .. كتبت لكم موضوع شامل عنها ... وقررت اكتب عن سنة ثانية بعد .. لان الصراحة شوي كانوا مقصرين ان يعلمون الطلبة بعد ما انقبلوا عن شنو رأح يأخذون .. او شنو النصايح لهم .. ان شاء الله تستفيدون من هالموضوع
اولا ... الف مبروك لكل من انقبل طب أو اسنان .. و welcome to the real world !!
عالم يديد مختلف كليا عن سنة أولى .. لا تخترعون .. لانها عالم حلو .. لأن بالفعل راح تدرسون مواد طبية بحتة غير عن مواد العلوم التمهيدية..وتحسون انكم دكاترة
مراح اتكلم عن شعوري بهالسنة .. لأنها كانت يديدة علي من كل النواحي .. اترك التجربة لكم ..
وكتابتي للموضوع عبارة اخطاء انا وقعت فيها .. والحمدلله تعلمت هالسنة وااااااايد اشياء .. صج اني طلعت منها بنسبة كلش ما تدل على مستواي .. لكن الحمدلله .. اهم شي اني اكتسبت خبرات للسنين الياية ... سنة ثانية اهيه المطب .. الحين الحمدلله راح منكم خوف القبول والتنافس على المقاعد
والحين يا دور هندسة الوقت .. القدرة على ربط المعلومات .. ايجاد طرق للتلخيص وحفظ المعلومات .. لارجاعها بسهولة ..القدرة على الفهم والتخيل .. والقوة لتحدي الصعاب .. والتعلم من الاخطاء
سنة ثانية عبارة عن أساس الطب .. راح يتم الأخذ فيه المواد الأساسية اللي يبنى عليها الطب .. جزء منها طبعا مو كلها .. وبعضها مقدمة فيها .. وان شاء الله بالسنين الياية لما تأخذون اجهزة كاملة من الجسم .. راح تلاحظون انكم راح تدرسون الجهاز من خلال الربط بالعلوم الأساسية .. فتعرفونه من جميع النواحي
-
نظام سنة ثانية
تنقسم الى
الكورس الأول foundation block 1 : + مادة بس يأخذونها طلبة الأسنان .. لرؤية الموضوع الخاص بهم اضغط هنا .. + english 183 ولرؤية الموضوع الخاص به اضغط هنا
الكورس الثاني : Foundation block 2 + I&I module + فاينل للسنة كلها
لرؤية الموضوع عن foundation block 2 هنا
I&I module هنا
المجموع الكلي لعدد الوحدات المجتازة في سنة ثانية 29 وحدة
- تقسيم الدرجات بالنسبة لدفعتنا 2009 و 2008كان 40% للامتحانات اللي تمت طوال السنة .. و 60% لامتحان الفاينل اللي بنهاية السنة .. من 24 وحدة
- لكن الenglish 183 برا حسبة هالدرجات ..لان بروحه 5 وحدات
الاختلافات اللي راح تواجهكم بسنة ثانية
1- راح تتواجدون كلكم شباب وبنات بقاعة وحدة اللي اهيه 141 .. طلبة الأسنان + البشري
2- المحاضرة راح تتلقونها كلكم مرة وحدة من نفس الدكتور
3- الحضور عبارة عن ورقة فيها الأسامي .. وكل واحد يوقع يم اسمه .. ويقولون ان ضروري يظل توقيعك ثابت لأن يجيكون على حسب كلامهم
4-الدراسة أول بأول !! كمية النوتات اكبر بوااااااايد من سنة أولى .. ماكو مجال للمقارنة .. حتى المواضيع راح تكون الأغلب يديدة عليكم وبتفاصيل كثيرة
5- الأسئلة بالامتحان دقيقة حييييييييييل !!! ودعوا سوالف سنة أولى .. وطريقة اسئلتها .. حييييل حيييييييل دقيق .. اول امتحانات لي ما دققت وايد بس فهمت ال main concept كليتها عدل !! لان يبون ادق التفاصيل وكل شي حفظ بالنوتة ما ينقط منها شي الا اذا الدكتور بنفسه قالكم هالشي مو حفظ ( ولو ان الله يسامحها الدكتورة مي مغربي قالت لنا عن شي مرة لا تحفظونه لكن يا سؤال عنه بالامتحان .. حتى الفارما سووها فينا .. ) فكل شي جايز !!
6- الدرجات طبعا هم غير عن أولى .. الأفريج راح يكون c + و c !! فلا تخترعون .. ال A طبعا عادي تشوفون 2 بس من كل الدفعة يابوها ..ممكن اكثر طبعا على حسب شطارة الدفعة وسهولة الامتحان .. ماكو شي اسمه ماينس .. النجاح 60 % فما فوق
7- راح تستعملون ايميل ال Hsc وااايد .. لازم كل يوم تطلون عليه .. راح يدزون لكم عليه أشياء مهمة سواء الجدول او تغييرات بمواعيد المحاضرات او قروباتكم لل pbl والخ.
يتم الدخول له عن طريق http://www.hsc.edu.kw
ثم techniqal support administration ثم خانة hsc services اللي على اليمين ثم .. hsc e-mail
** الفاينل الأخير
بعد ما تخلصون من ال i&I ,, راح توقفون كل المحاضرات .. ويعطونكم عطلة تقريبا اسبوعين ... عشان عقبها راح تمتحون كل FB1 بيوم .. وكل FB2 + i&I بيوم ثاني .. لا تحاتون هالشي !! راح تقدرون ان شاء الله !! كل النوت انتوا دارسينها من قبل وممتحنين فيها .. نطموا وقتكم عدلللل ... ولا تطولون على النوت وايد !!! ماكو طريقة معينة للدراسة ... كل واحد كان يسوي جدول مختلف عن الثاني وينقي الطريقة اللي تناسبه .. لكن نصيحة .. حافظوا على نفسكم وعلى صحتكم ... انا تأذيت وااااااااايد لأن التهب علي ضرس العقل وكنت ما اقدر لا انام ولا ادرس من الألم .. وفي ناس مرضوا وظلوا يراجعون المستشفيات وضيعوا وقتهم ... اللي عدوها مو احسن منكم بشي !! سووا لكم جدول والتزموا فيه .. وخلوا لكم يوم بريك او تطلعون فيه تغيرون جو .. وبين فترة وفترة اخذوا بريك عشان تشحنون طاقتكم .. الوقت راح يمديكم !!! وعليه ترا درجات واااايد ... لا تضيعونهم من ايدكم
الري ست
اذا قدر الله وما نجحتوا بالفاينل الأخير .. في على طول دايركت راح يتسجلون اسامي الطلبة لاختبار الريسيت .. وعادة وقته يكون قبل الدوامات باسبوع تقريبا .. يعني عندهم الصيف كله يستعدون عدل ... نفس سنة اولى .. لا يمكن ايبون اعلى من C !! .. والامتحان اهمه وحظهم .. مرة يكون صعب والأسئلة يديدة .. ومرة زين .. ومرة سهل .. ممكن ما يكررون اسئلة ..
لجنة التفاريغ
هالسنة راح يكون عندكم لجنة خاصة عبارة عن مجموعة من الطلبة من دفعتكم .. راح يمسكون التفاريغ .. والتفاريغ عبارة تفريغ المعلومات اللي ذكرت بالمحاضرة وتدوينها على اوراق a4 .. غير النوتة الأساسية !!! ممكن تنطبع عند بو طلال او تطبعونها من موقع الرابطة .. التفاريغ راح تتقسم على الدفعة .. بالدور .. وكل قروب يسوي تفريغ .. تقريبا بكل تفريغ 3 الى 4 طلبة .. وطبعا ببداية السنة راح يبلغونكم بهالشي
لان ممكن الدكاترة ايبون بالامتحان كلام من عندهم قالوه بالمحاضرة مو موجود بالنوت .. وخاصة الدكتور خالد خان ... وطبعا يفيدكم ان شاء الله حق المواد .. على حسب الدفعة .. بعضهم يبون كل المواد تتفرع .. وبعضهم مثلا يحسون ان في مواد ما تحتاج تتفرغ .. حرصوا على انكم تفرغون عدل .. وتخلصونه مبجر عشان انتوا تستفيدون منه ودفعتكم بعد تستفيد
فبعد ما يخلصون الطلبة من تفريغهم يدزونه حق لجنة التفاريغ واهيه اللي بيدها تطبعه للدفعة وتنزله على الموقع
ملاحظة : هاللجنة مو رسمية !! ولا يدرون عنها الدكاترة .. ولا لهم شغل فيها .. مجرد الطلبة يسوونها عشان يساعدون بعض .. وهالشي معروف عند الطلبة من سنة ثانية وفوق ... فديروا بالكم تورون الدكاترة هالتفاريغ !!!
ولا تسئلونهم عنهم
ممكن تلقون بالتفاريغ أغلاط .. ساعات من السرعة يقول الدكتورة كلمة غلط بالمحاضرة .. فتتسجل دايركت بالتفريغ .. فانتوا لا تعتمدون عليهم بشكل اساسي !!! جيكوا على المعلومات لو شكيتوا فيها انها غلط .. وبلغوا اللجنة
Pbl
( problem based learning )
عبارة عن هم الدفعة توزع على قروبات .. كل قروب بغرفة معينة مع دكتور .. ويعطونكم حالة ..تقسم على جزئين بيومين بعاد عن بعض .. تكون من المحاضرات اللي مأخذينهم .. وتحطون افتراضات .. وترتبون افكاركم .. وتناقشون .. وتبحثون مع بعض .. واخر شي توزعون مجموعة مهام لكل طالب مهمة ... وعقب راح تجتمعون بالجزء الثاني .. كل واحد يعرض اللي سواه .. سواء يقراه او يايب صور او يعرضه على باور بوينت .. ومن المهام .. ومن نتايج الاختبارات .. راح تندز لكم بالايميل .. راح تتوصلون لسبب الحالة او نتايجها .. يعني بهالطريقة .. انتوا جنكم مثلتوا شنو اللي يصير بالمستشفى لكن داخل غرفة ...
ان عندي حالة مرضية .. خذيت التاريخ مالها ..وحطيت افتراضات وعقب طلبت فحوصات واختبارات .. وعقب ما يطلعون .. قررت السبب وشنو المرض وعلاجه .. جذي راح يفيدكم انكم تجمعون المعلومات من المحاضرات .. وتركز ببالكم اكثر مع النقاش وطريقة الشرح ..
ما عليه درجات بسنة ثانية .. لكن ممكن المعلومات الموجودة تدخل بالامتحان .. لأن المواضيع متعلقة بالمحاضرات اللي راح تأخذونهم ..
Clinical skills
واللي اهوه بالعربي المهارات الاكلينيكية .. راح تأخذونه تقريبا 3 مرات بسنة ثانية .. راح تنقسمون ان شاء الله لقسمين من الطلبة .. وداخل كل قسم فيه مجموعات عبارة عن اربعة من الطلبة يتم اختيارهم على حسب ترتيكم بكشف الأسماء serial number .. ما يدخل بالامتحان .. ولا عليه درجات .. لكن الحضور مهم حيل .. ولازم اتيبون سماعتكم معاكم .. وتلبسون اللابكوت
ملاحظة : الpbl وال clinical skills راح تأخذونه ضمن ال I&I module
نظام الغياب :
1- الحد الأعلى لعدد الغيابات خلال السنة الكاملة هو 20% من عدد المحاضرات كلها
2- لمعرفة الغياب لابد من التوجه الى قسم التوجيه والارشاد الخاص بكلية الطب الموجود بالدور الأرضي المبنى القديم ورا لوبي البنات يم باب الحديقة .. اهوه المكان اللي يكون عقب الممر اللي يودي صوب مكتب العميد
3- اذا مشيت بهالممر سيدا .. راح تلقى على ايدك اليسار دريشة مالت غرفة فيها موظفين .. اسألهم عن ورقة غيابك وراح يعطونك اياها
ونصيحتي انك تحضر وما تضيع المحاضرات لأن حتى لو استعنت بالتفاريغ بتحس نفسك ضايع .. راح يقول الدكتور .. here u can see this and that .. انزين الدكتور وين قاعد يأشر ؟؟ على اي رسمة ؟؟ وين بالضبط ؟ ما تدري
4- حضور ال pbl و ال clinical skills يختلف اعتقد مو اكيد في حالة غيابك مرتين من واحد منهم سوف تحرم من حضور الامتحان وتعتبر مأخذ F اسم الله عليكم
طريقة الامتحانات
First term
Mid term assessment 1-
4 papers
كل paper عبارة عن مادة .. راح تمتحنون اول مرة كل مادة بروح
Anatomy
Theory 60% تقريبا شي وثمانين سؤال ( مو متأكدة)
Practical 40% تقريبا ثلاثين .. اللابكوت طبعا ضرورييييي .. ممكن يكون بروحه او مع الانقليش بنفس اليوم .. او مع امتحان الاناتومي بنفس اليوم
Physiology 60Q
Biochemistry 80Q
Practical 10% اللي تسوونه باللاب وتسلمون اوراقه بس مو داخل الامتحان
SDHI
60 Q
تقريبا نص المواد
End of term exam 2-
النص الثاني للمواد .. لكن ممكن يدخلون ملوت الامتحان اللي فات معاكم !!
2 papers
(biochem + sdhi )
( anatomy + physiology)
او ممكن يتغيرون المواد اللي مع بعض .. انتوا تختارون .. كل بيبر بيوم
ممكن الأسئلة تكون مخلوطة مع بعض .. يعني سؤالين فسيو .. بعدين اناتومي .. او مفصولين .. اذا خلص كل البيوكم .. يبدي عقبه ال sdhi
Second term
foundation block 2 exams 1-
راح تمتحون بكل المادة !!
Papers 2 ( تقريبا 100 لكل واحد فيهم ) كل واحد بيوم بروحه
Pathology + psychology
و
Pharmacology + microbiology
او ممكن يتغيرون منو المواد اللي مع بعض وانتوا تختارون
i&i exam
1 paper
كل اللي خذيتوه بالخمس اسابيع فاهوه معاكم بامتحان واحد
100 Q
- 60 mcq
- 40 emq
End exam 3-
اللي اهوه كل الفاينل يكون على نص شهر ستة
2 papers
الكورس الأول بيوم 100 Q
والثاني بيوم 100 Q
استنتناج من نفسي : لاحظت ان كل ما كانت الامتحانات قريبة من بعض .. كل ما كرروا اسئلة اكثر من الامتحانات اللي فاتت !!! كل ما بعدوا عن بعض .. زادوا بالأسئلة اليديدة والصعبة شوي
نصايح عامة :
1- اشتروا الكتب للأناتومي والمايكرو والبيوكم .. الباثو والفسيولوجي .. لأن هذيل اساس الطب ويعتبرون مراجع .. وان شاء الله الرابطة تسوي خصم 100% على الكتب بعدين مثل ما عودونا .. ففلوسكم ترجع لكم ... ولا تنسوووون خشوا الفواتير !!
2-ساعدوا بعضكم البعض .. هالشي فيه بركة ان شاء الله لكم !! لي سويت ملخص دزه حق الريب او الربة .. او تبادل مع ربعك .. واحد منكم يلخص شي .. والثاني شي ثاني .. وتصير عندكم مجموعة ملخصات حلوة لكم .. تفيدكم حق الفاينل ان شاء الله وحق الامتحان نفسه .. وترا تركز المعلومة منه ما شاء الله
نظموا وقتكم عدل طول السنة .. شوية وناسة واغلب الوقت دراسة .. ولا تنسون صلة الرحم ..
3- راح تسمعون واااااااايد عن هالسنة .. انها المطب وصعبة .. ماكو شي صعب للي يدرس ويتعب .. ويجابل ... اهيه لأنها يديدة عليكم .. وراح تتغير طريقة دراستكم ... بس ان شاء الله تتعلمون وتبدعون فيهم
ولله الحمد ... هذا كل اللي بتأخذونه بسنة ثانية .. عسى ربي يوفقكم ويسهل عليكم كل صعب ... وانتوا ان شاء الله باذن الله قدها يا دكاترة المستقبل .. شدوا حيلكم .. وربي ما يضيع تعب احد .. خل قلبكم قوي .. ومو عيب الواحد يغلط .. العيب ان يتم على غلطه وما يصلحه .. سألوا الكبار قد ما تقدرون شنو واجهوا .. وشلون تغلبوا على الأمور .. واعتذر لو كان في اي غلط .. وبالنهاية احنا بشر ... والناس تجارب .. وقدرات ...
بالتوفيق
دمتم بود
