عرض مشاركة واحدة

معلمة علوم

:: الادارة ::

#3
يالغالية توني اشوف هالموضوع والله ومثل ما قالت لج اختي فرفوشة انا شوي تعبانه لكن بحاول اساعدج حسب الوقت اللي موجود عندنا لانه الورشة باجر والله يساعدج ان شاء الله
الفصل اللي صار من نصيبج بصراحة احلي فصل كله انشطة وتجارب بقمة الروعة ..... يالغالية لازم تسوين بور بوينت تكلمين فيه عن هذا الفصل حطي الانشودة في بداية الورشة وحلو لو تسوينها علي وسيله كبيرة كلوحة جدارية واذا ما تقدرين سويها شفافية المهم تنعرض واذا عندكم بالمدرسة هالانشودة بشريط احلي واحلي بعد
تكلمي بالبوربوينت عن الدرس الاول وهو كيف تنمو البذرة وحطي وسيلة مراحل نمو البذرة وان حصل وحطي بنات يزرعون بذور شي حلو وطيب لانه هذا نشاط مطلوب منهم
حطي فيلم عن انتشار البذور وهالفيلم موجود بالمنتدي واذا في مجال خلي مثل معرض جانبي علي يمينج صغير فيه مشاريع البنات في هالفصل من السنوات السابقة مثل لو تحطين دلاغات فيها شوك او تجيبين بذور تطير مثل نبات الدفلة والهندباء موجودين بالشارع شكثر هذا للعرض فقط
تكلمي عن الدرس الثالث وهو ماذا يحتاج النبات لكي يعيش حطي مصورات وان حصل انج تسوين حركة مثل تعرضين مشكلة وتقولين مثلا اشترت مها زهرة جميلة ووضعتها في كأس به ماء ووضعتها في غرفتها وبعد فترة ماتت الوردة يا تري ما هو السبب ؟؟
تكلمي بالبوربوينت عن الدرس الرابع عن اجزاء النباتات التي ناكلها وحلو لو تحطين عينات صجيه مثل جزر وقصب السكر وقرنبيط والخ وتقدرين تحطينهم في سله وتقدمينها اهداء للحضور حركة تشيحط خخخخخ
اذا عندج لعبة تربوية عن اجزاء النبات مثلا تسوين تركيب بازل او تسوين لعبة تعرفين لعبة الدومينو سوي نفسها بس خلي اللعبة مقسمة جزئين ( جزء تكتبين فية اسم جزء النبات مثلا جذور - والجزء الثاني تحطين صورة جزء النبات مثلا جزر والبنت تركب الصورة المناسبة للجزء المناسب)
تري هالالعاب مو مطلوبه منج بس انا قلت اعطيتج افكار اذا تحبين تميزين عن غيرج
اخر شي تكلمي عن مراجعة الفصل وعن نشاط هالفصل هو لعبة الغاز اجزاء النبات
اما بسالفة النقد انا بصراحة الفصل كله عاجبني بس سالفة تجربة استطلع الرطوبة احس نتائجها مو مضبوطة والتلاميذ بهالمرحلة يمكن ما يستوعبونها لو يحطون تجربة بديله بدالها احسن انا الحين ما تطري علي فكرة لكن اذا طرت علي راح افيدج فيها يالغالية
وبس سلامت طولج وعرضج
انتي فصلج عن النبات قدمي اهداءاتج عن النباتات مثل وردة الشتلات اللي شكلهم علي وجوة عند ابو 100 فلس
هذا اللي اقدر اساعدج فية وراح ارد علي الموضوع بعد شوي المسا اذا محتاجة اي استفسار انا حاضرة
بهالمنتدي في الكلمات الجديدة لكل المراحل مطبوعة جاهزة استفيدي منها وفي ادلة اللوحات الشفافة ممكن تساعدج بالورشة
بالتوفيق ان شاء الله ......سوي اللي تقدرين علية صدقيني راح يصير من اروع ما يمكن. *